Cyfreithwyr Swayne Johnson - Dinbych, Rhuthun, Llanelwy, Llandudno

Ysgariad

Yng Nghymru a Lloegr ni chewch gychwyn achos ysgariad nes i chi fod yn briod am o leiaf blwyddyn. Un sail yn unig sydd ar gyfer ysgariad, sef bod y berthynas 'wedi chwalu heb obaith o'i hadfer'. Er y bu galw am ysgariad heb fwrw bai, mae'n parhau yn ofynnol i chi ddarparu tystiolaeth bod y briodas wedi chwalu heb obaith o'i hadfer oherwydd un o bump ffaith:

Godinebu - h.y. gweithred o gyfathrach rywiol efo person o'r rhyw arall
Ymddygiad afresymol
Wedi gwahanu ers dwy flynedd gyda chydsyniad
Wedi gwahanu ers pum mlynedd
Gadael, lle bo un o'r pâr wedi gadael y llall am gyfnod di-dor o ddwy flynedd o leiaf

Er bod y broses cael ysgariad yn weddol syml, yn aml mae materion cymhleth yn gysylltiedig â'r broses. Felly mae'n hanfodol bwysig eich bod chi'n cael cyngor cyfreithiol priodol ar y cyfle cyntaf posibl.

Arweiniad cam wrth gam i'r broses ysgaru

Cam 1

Deiseb Ysgar

Dyma'r ddogfen sy'n nodi eich bwriad i ysgaru a sail yr ysgariad. Cyfeirir at y sawl sy'n cyflwyno'r ddogfen fel y 'Deisebydd' a'u priod fel yr 'Atebydd'.

Datganiad Trefniadau ar gyfer y plant

Os oes gennych blant, bydd y ffurflen hon yn nodi y trefniant yr ydych wedi ei gytuno efo'ch cymar mewn perthynas a'r plant ac yn cynnwys ble bydd y plant yn byw, pa ysgol y byddant yn ei mynychu a'r hyn y cytunwyd arno o ran cyswllt gyda'r plant.

Tystysgrif Priodas

Bydd ar y llys eisiau'r dystysgrif wreiddiol neu gopi ardystiedig. Os nad oes gennych chi'r dystysgrif wreiddiol, fe allwn ni wneud cais ar eich rhan i'r awdurdod perthnasol. Bydd rhaid talu ffi o £7 am gopi ardystiedig o'ch tystysgrif priodas.

Ffurflen eithrio rhag ffi

Os ydych chi'n derbyn rhai budd-daliadau penodol neu ar incwm isel, mae'n bosibl na fydd rhaid i chi dalu ffi'r llys am gyflwyno'r ddeiseb. Fe wnawn ni ddarparu'r ffurflen eithrio rhag ffi a thaflen esboniadol i chi i'ch cynorthwyo i lenwi'r ffurflen.

Ffi'r llys

Rhaid talu ffi'r llys, sy'n £300, wrth ddechrau achos ysgariad yng Nghymru a Lloegr. Dyma'r ffi gyfredol am gyflwyno deiseb ysgar ac mae'n daladwy onibai eich bod yn gymwys i gael eich eithrio rhag talu.

Cam 2

Yn unol â'r protocol cyfraith teulu rydym ni'n ei ddilyn, argymhellir anfon llythyr at y sawl fydd yn derbyn y ddeiseb (yr Atebydd) yn cynghori y bwriedir cyflwyno'r ddeiseb, cyn cyflwyno'r ddeiseb ysgar gan y llys. Diben hyn yw ceisio cytuno ar y sail ar gyfer y ddeiseb ac i roi cyfle i'r sawl fydd yn derbyn y ddeiseb gael cyngor cyfreithiol annibynnol.

Cam 3

Bydd yr holl ddogfennau'n cael eu hanfon i'r Llys Sirol lleol, a fydd yn postio'r dogfennau i'r parti arall. Mae'r dogfennau hyn yn cynnwys ffurflen 'Cydnabod Cyflwyno' y bydd yn ofynnol i'r Atebydd ei llenwi a'i dychwelyd i'r llys neu i'w gyfreithwyr cyn pen 7 diwrnod. Diben y ffurflen hon yw cydnabod bod yr Atebydd wedi derbyn y ddeiseb ysgar a dynodi p'un ai yw'n bwriadu amddiffyn y ddeiseb ai peidio. Os nad yw'r Atebydd yn llenwi a dychwelyd y ffurflen, gwneir trefniadau i gyflwyno'r dogfennau yn bersonol gan Feili'r llys neu Gyflwynydd Gwysion. Os nad yw hi dal yn bosib cyflwyno y parti arall yna mae modd gwneud cais i'r llys am ffyrdd eraill o gyflwyno e.e. cyflwyniad dirprwyol yn eu gweithle.

Cam 4

Affidafid

Mae'n rhaid i'r unigolyn sy'n cyflwyno'r ddeiseb ysgar dyngu ar lw fod popeth yn y ddeiseb ysgar yn wir. Enw'r ddogfen ar lw hon yw Affidafid ac fe'i cedwir gan y llys

Cam 5

Dyfarniad Nisi / Amodol

Bydd yr Affidafid ar lw a'r dogfennau ysgariad yn cael eu prosesu gan y Barnwr Rhanbarth yn y llys, a bydd rhaid iddo fod yn fodlon bod sail ar gyfer ysgariad. Yna bydd y llys yn pennu dyddiad cyhoeddi'r Dyfarniad Nisi. Mae'n annhebygol iawn y bydd angen i chi fod yn bresennol yn y llys ar y dyddiad hwn, ond fe wnawn ni eich cynghori chi os oes angen i chi fod yno. Nid yw'r Dyfarniad Nisi yn diweddu'r briodas, yn hytrach mae'n gadarnhad gan y llys y gellir bwrw ymlaen gyda'r ysgariad.

Dyfarniad Absoliwt / Terfynol

Gall y Deisebydd (yr unigolyn sy'n cyflwyno'r achos ysgariad) ddiddymu'r briodas drwy'r hyn a elwir yn Ddyfarniad Absoliwt. Yn gyffredinol y dyddiad cyntaf y gellir gwneud cais am archddyfarniad terfynol (Decree Absolute) yw 6 wythnos ac 1 diwrnod ar ôl yr archddyfarniad cyntaf (Decree Nisi). Rhaid talu ffi'r llys, sef £40, onibai bod gennych chi'r hawl i gael eich rhyddhau rhag talu'r ffi. Cyn y Dyfarniad Absoliwt fe wnawn ni ystyried y materion isod gyda chi yn ofalus iawn.

(i) Os na chytunwyd ar setliad o ran eich materion ariannol mae'n bosibl y gwnawn ni eich cynghori chi i oedi cyn cael y Dyfarniad Absoliwt gan fod modd colli hawliau pwysig iawn unwaith y bo'r Dyfarniad Absoliwt wedi'i wneud, yn enwedig o ran pensiynau.

Os mai chi yw'r Atebydd

(ii) Hefyd fe wnawn ni eich cynghori chi i lunio Ewyllys newydd ar ôl cael Dyfarniad Absoliwt, os nad ydych wedi gwneud hynny eisoes. Os chi yw'r unigolyn sy'n derbyn y dogfennau ysgariad, unwaith y cyhoeddir y Dyfarniad Nisi, yr adeg cyntaf y cewch chi wneud cais i'r llys am Ddyfarniad Absoliwt fydd ar ôl i chwe wythnos a diwrnod a thri mis fynd heibio. Yn ychwanegol, bydd rhaid i chi gyflwyno cais ffurfiol i'r llys sy'n golygu y bydd rhaid i chi hysbysu'r Deisebydd eich bod chi'n gofyn i'r llys am y Dyfarniad Absoliwt a gofynnir i chi fod yn bresennol mewn gwrandawiad ffurfiol.

Os ydych chi wedi derbyn Deiseb Ysgar drwy'r post eisoes a'ch bod chi'n ymwybodol bod eich priod wedi cyflwyno deiseb, chi fydd yr Atebydd yn yr achos a bydd yn ofynnol i chi lenwi'r hyn a elwir yn ffurflen 'Cydnabod Cyflwyno'r Ddeiseb'. Anfonir y ddogfen hyn i'r Atebydd gyda'r Ddeiseb Ysgar a'r Datganiad Trefniadau ar gyfer y plant, os oes gennych chi blant. Gofynnir i chi ddychwelyd y ffurflen Cydnabod Cyflwyno'r Ddeiseb' i'r llys, ac os ydych chi'n derbyn y Ddeiseb Ysgar, bydd eich priod yn gofyn i'r llys am Ddyfarniad Nisi. Nid yw'r ysgariad yn derfynol nes bo'r Dyfarniad Nisi wedi'i wneud yn Ddyfarniad Absoliwt. Gall eich priod wneud cais am Ddyfarniad Absoliwt chwe wythnos a diwrnod ar ôl cyhoeddi'r Dyfarniad Nisi. Fodd bynnag, os nad yw eich priod yn gwneud cais o fewn tri mis i'r dyddiad hwnnw, oddeutu 4 1/2 mis ar ôl Dyfarniad Nisi fe gewch chi wneud cais am Ddyfarniad Absoliwt. Trefnir cynnal gwrandawiad byr a bydd y Barnwr yn ystyried a yw'n rhesymol gwneud yr ysgariad yn derfynol.

Os hoffech gael rhagor o wybodaeth lawrlwythwch ein taflenni gwybodaeth am ysgariad a'r dewisiadau amgen yn hytrach nag ysgariad.

HMCS

English